“Mercedes” traktora çırpıldı: 1 ölü, 5 yaralı

Quba rayonu ərazisində ağır yol-nəqliyyat hadisəsi qeydə alınıb. Qəza Bakı-Quba yolunun 151-ci kilometrliyində baş verib. Qusar rayonu Quxuroba kənd sakini Əlimov Valeh Ləşkər oğlunun idarə etdiyi 10 TT dövlət nömrə nişanlı “Mercedes” markalı minik maşını “Belarus” markalı traktora çırpılıb.

Qəza nəticəsində Dağıstan vətəndaşı Maqomedova Gitinayaf Maqomedxanovna həlak olub, daha beş nəfər isə yaralanıb.

“Mercedes”in sürücüsü də daxil olmaqla, avtomobildə olan Rusiya vətəndaşları - 21 yaşlı Əhmədova Xadijat Abdurrahmanovna, 33 yaşlı Gimbatova Diana Hüseynovna və 34 yaşlı Süleymanova Suaybat Hüseynovna xəsarət alıb.

Traktorun sürücüsü, Quba rayonu Amsarpalasa kənd sakini Seyfiyev Ramiz Əzim oğlu da yüngül xəsarət alıb. Yaralılar Quba Mərkəzi Rayon Xəstəxanasına yerləşdirilib.

Xəstəxanadan Lent.az-a verilən məlumata görə xəsarət alanların vəziyyəti qənaətbəxşdir. Onlar bu gün evlərinə buraxılacaq.

Hadisəni Baş Dövlət Yol Polisi İdarəsinin İstintaq və təhqiqat şöbəsinin əməkdaşları araşdırırlar. Şöbənin müstəntiqi Hikmət Kərimovun Lent.az-a verdiyi məlumata görə, hadisəyə səbəb “Mercedes”-in sürücüsünün diqqətsizliyi və traktorun arxa işıqlarının saz olmamasıdır.

Vəli Turan