Cəlilabadda 17 yaşlı oğlana yırtıcı hücum edib

Cəlilabad rayonunda bədbəxt hadisə baş verib.
Lent.az-ın ANS PRESS-ə istinadən məlumatına görə, rayonun Gülməmmədli kəndində 1992-ci il təvəllüdlü Zahid Şakir oğlu İsgəndərov qoyun otararkən vəhşi heyvanın hücumuna məruz qalıb. Bəbir olduğu güman edilən heyvan gəncin üzünü və bədəninin bəzi hissələrini parçalayıb.
Yaralının qohumlarının verdiyi məlumat görə, hadisə bu gün günorta saat 14.00 radələrində olub. Heyvanın Zahidə hücum etdiyini görən digər kənd sakinləri hadisə yerindən qaçıblar. Z.İsgəndərova xəsarət yetirəndən sonra heyvan özü də gözdən itib.
Kənd sakinlərinin sözlərinə görə, bu vaxta qədər kənddə belə bir hadisə ilə qarşılaşmayıblar. Sakinlər kənd meşəsində bəbirin olması barədə belə məlumatsız olduqlarını bildiriblər. Onlar güman edirlər ki, bəbir kənd ərazisində İrandan gələ bilər.
Qeyd edək ki, hazırda 17 yaşlı yeniyetmə ağır vəziyyətdə rayon xəstəxanasındadır.