Əliməmməd Nuriyev təcridxanada “Nida”nın rəhbəri ilə görüşüb

“Konstitusiya” Araşdırmalar Fondu Baş Mütəşəkkil Cinayətkarlıqla Mübarizə İdarəsinin Müvəqqəti Saxlama Təcridxanasında monitorinq keçirib. Fonddan Lent.az-a verilən məlumata görə, monitorinq ATƏT-in Bakı ofisinin dəstəyi ilə “Konstitusiya” Araşdırmalar Fondunun həyata keçirdiyi “Saxlama yerlərinin monitorinqi - 2012” layihəsi çərçivəsində baş tutub. Monitorinqi “Konstitusiya” Araşdırmalar Fondunun prezidenti Əliməmməd Nuriyev, eksperti Elçin Salmanov aparıb.

Monitorinq zamanı müvəqqəti saxlama təcridxanasının saxlama kameraları, növbətçi hissə, müstəntiq, vəkil, tibbi müayinə, ibadət otaqlarına, mətbəxə, kitabxanaya, gəzinti meydançasına, sanitar qovşağa baxış keçirilib. Eyni zamanda təqsirləndirilən və şübhəli bilinən şəxslərin qeydiyyatı və tibbi müayinə jurnalına baxılıb. Monitorinq zamanı Abşeron Rayon Məhkəməsi tərəfindən barəsində İnzibati Xətalar Məcəlləsinin 310.1-ci maddəsinə əsasən 15 gün müddətinə inzibati həbs qərarı çıxarılan “Nida” Vətəndaş Hərəkatının üzvü Zaur Qurbanlı ilə görüş keçirilib. Z.Qurbanlı saxlama şəraitindən və təcridxana əməkdaşlarının rəftarı ilə bağlı hər hansı bir şikayətinin olmadığını bildirib.