"Tanrıların hədiyyəsi" tapıldı - Bu nədir?

İndoneziyada arxeoloqlar unikal bir artefakt aşkarlayıblar. Yeni tapılan konus formalı bürünc baltanın yaşı üç min ildən çoxdur. Alimləri təəccübləndirən təkcə onun görünüşü deyil, həm də mənşəyidir.

Harada tapılıb?

Lent.az xəbər verir ki, artefakt Kalimantandan olan bir kəndlinin şəxsi kolleksiyasında aşkarlanıb. Kişi baltanı dayak xalqına aid ənənəvi daş alətləri və muncuqlarla birlikdə saxlayırmış. Onları qızıl yuyarkən tapıb. Lakin məhz konus formalı bürünc balta dərhal tədqiqatçıların diqqətini cəlb edib.

“Şimşəyin hədiyyəsi” və hakimiyyətin rəmzi

Yerli sakinlər bu cür əşyaları Gigi Petir və ya Untu Gledek, yəni “şimşək dişləri” adlandırırlar. Onlar müqəddəs hesab olunurdu və göydən gəlmənin rəmzi – “tanrıların hədiyyəsi” sayılırdı. Arxeoloqlar da baltanın hazırlanmasında meteorit mənşəli metalın istifadə olunmuş ola biləcəyini istisna etmirlər.

Ekspertlər qeyd edirlər ki, belə bir baltanın hazırlanması mürəkkəb bürünc tökmə texnikası tələb edib. Onun kiçik ölçüsü və dekorativ forması artefaktın əmək aləti deyil, mərasim əşyası, status göstəricisi və ya ticarət predmeti kimi istifadə olunduğunu göstərir.

Tarixi necə dəyişə bilər

Arxeoloqların sözlərinə görə, bu tapıntı qədim Kalimantan cəmiyyətlərinin əvvəl güman edildiyindən daha inkişaf etmiş olduğunu sübut edə bilər. Balta həm praktik, həm də rituallarla bağlı funksiyaları birləşdirən yüksək səviyyəli metallişləmə mədəniyyətini nümayiş etdirir.

Hazırda ekspertlər artefaktın autentikliyini təsdiqləmək üçün əlavə tədqiqatlar aparmağı planlaşdırırlar.