Obama və Gül erməni protokollarından danışıblar

Ankara və İrəvan arasında münasibətlərin normallaşdırılmasına yönəlik səylərin davam etdirilməsi gərəkli sayılıb

Bazar günü Türkiyə prezidenti Abdulla Gül və ABŞ prezidenti Barak Obama arasında telefon danışığı olub.

Lent.az-ın verdiyi məlumata görə, bu barədə Ağ Ev açıqlama yayıb.

Prezidentlər Türkiyə və Ermənistan arasında imzalanan protokollar, Əfqanıstandakı durum və Kipr məsələsi ətrafında müzakirə aparıblar.

Açıqlamada bildirilir ki, Barak Obama və Abdulla Gül protokolların imzalanmasından sonra Ankara və İrəvan arasındakı münasibətlərin son durumu barədə danışıb, münasibətlərin normallaşdırılması yolunda atılan tarixi addımın vacibliyini vurğulayıblar və bu istiqamətdə səylərin davam etdirilməsini gərəkli sayıblar.

Tərəflər Əfqanıstanda sabitliyə nail olunması istiqamətində əməkdaşlığın davam etdirilməsi yönündə də razılığa gəliblər.