Burqas-Aleksandrupolis kəməri tikilməyəcək
15 noyabr 2010 15:53 (UTC +04:00)

Burqas-Aleksandrupolis kəməri tikilməyəcək

Rusiya neftinin Bosfor və Dardanel boğazlarından yan keçməklə, Bolqarıstan və Yunanıstandan üzərindən nəqlini həyata keçirmək üçün nəzərdə tutulan Burqas-Aleksandrupolis Transbalkan neft kəməri ekoloji risklərə görə tikilməyəcək. Lent.az-ın “Reuters” agentliyinə istinadən verdiyi məlumata görə, belə bir bəyanatla bu gün Bolqarıstanın baş naziri Bayko Borisov çıxış edib.

Baş nazir bu ideyanın rədd edildiyini vurğulayıb.

Qeyd edək ki, Rusiya və Bolqarıstan bu kəmərin tikintisi ilə bağlı müqaviləni 2008-ci il fevralın 6-da imzalayıb. Layihənin 1 milyard dollara başa gələcəyi hesablanıb. Ötən həftə Rusiyanın baş naziri Vladimir Putinin Bolqarıstana səfəri zamanı Bayko Borisov bildirib ki, Bolqarıstan Burqas-Aleksandrupolis layihəsi üzərində işləmək niyyətindədir, hazırkı mərhələdə layihədə Bolqarıstanın ekologiyasını poza biləcək problemlər var.

Ekoloji qiymətləndirmə başa çatdıqdan sonra Bolqarıstan hökumətinin son qərarını 2011-ci ilin fevralında açıqlayacağı gözlənilir.
# 337

Oxşar yazılar