Yəhudilər İran banklarını məhkəməyə verib

Atom-nüvə proqramını gerçəkləşdirmək israrı və beynəlxalq terrorçuları dəstəkləməsi Tehran üçün ciddi problemlər yaratmaqdadır.

Lent.az-ın “The Jerusalem Post”a istinadən verdiyi məlumata görə, İkinci Livan savaşı zamanı “Hizbullah” raketlərindən zərər görmüş İsrailin 85 vətəndaşı Vaşinqton federal məhkəməsində İranın bir neçə bankına qarşı cinayət işinin açılması ilə bağlı müraciət edib. Şikayətçilər İslam Respublikasının bu qurumlarını terrorçuları maliyyələşdirməkdə günahlandırırlar.

İsrail vətəndaşları tərəfindən açıqlanan bəyanatda deyilib ki, həmin banklar “Hizbullah”a ümumilikdə 50 milyon dolardan artıq pul veriblər. Bu maliyyə vəsaiti ilə alınan silahlarla Amerikanın İsrail ərazisindəki obyektləri də vurulub. İddiaçılar 1 milyard dollar məbləğində kompensasiya tələb etməklə yanaşı, günahkarların cəzalandırılmasını da istəyir.

Qeyd edək ki, iddiaçılar arasında ABŞ və Kanada vətəndaşları da var. Həmin hərbi əməliyyatdan ya onların özləri, ya da yaxınları zərər çəkib.

Sədrəddin Soltan