İran “ölüm maşınları”nı dəyişir

Tehran “Tu-154” təyyarələrini “Tu-204”-lə əvəzləyəcək

İranın yol və nəqliyyat naziri Həmid Bəhbəhani Nazirlər Kabinetinin iclasından sonra jurnalistlərə açıqlamasında bildirib ki, İranın hava limanlarında İslam Respublikasına məxsus Rusiya istehsalı olan “Tu-154” təyyarələrini “Tu-204”lər əvəzləyəcək.

Nazir qeyd edib ki, bu “Tu154”ün istimardan çıxarılması demək deyil. Onun sözlərinə görə, Rusiya ilə “Tu-204”ə dair müqavilə imzalanıb, bu anlaşma hələlik gerçəkləşməyib. Nazir deyib ki, yanvarda Məşhəddəki “Taban” aviaşirkətinə məxsus “Tu-154”ün qəzaya uğramasında təyyarəçi suçlu imiş.

Xatırladaq ki, bu il yanvarın 24-də Məşhəddəki Şəhid Haşiminijat adına hava limanında “Tu-154”ün qəzaya uğraması nəticəsində 42 nəfər yaralanmışdı.

2009-cu ilin yayında isə İranın “Caspian Airlines” hava şirkətinə məxsus “Tu-154” təyyarəsi Tehran-Yerevan reysi edərkən havada partlamış, 150 nəfər həlak olmuşdu.
Bu olaydan sonra Tehran Rusiyadan “Tu-154” almayacağını bəyan etmişdi.

Sədrəddin Soltan