2023-ün yaz-yay dəbi necə olacaq? – Məşhur modelyer AÇIQLADI

Havalar isindikcə paltarlar rənglənməyə başlayır. Yazın gəlişi tək təbiəti deyil, dəb aləmini ruhlandırır. Allı-güllü baharın rəngləri artıq geyimlərdə seçim şanslarını artırır. Hər il olduğu kimi bu il də yaz ayları özünəməxsus dəbi, fərqli geyim modelləri ilə yadda qalacaq.

Bu ilin yaz dəbi haqqında Lent.az-a Azərbaycan Milli Geyim Mərkəzinin rəhbəri, sənətşünaslıq üzrə fəlsəfə doktoru, tanınmış modelyer-dizayner Gülnarə Xəlilova danışıb.

Onun sözlərinə görə, paltarlarda dəliklərin olması bu ilin dəb siyahısındadır:

“2023-ün yaz və yay aylarında dəbdə olacaq bir neçə rəng tonları var. Bu il açıq bej tonlar, ağ, tünd göy rəng, bozun yaşılla qarışıq tonları, qırmızı, firuzə rəngi gündəmdə olacaq. Daha sonra ağ-qara-bej tonları, bej-qara tonların bir yerdə təqdimatı bu ilin trendi sırasındadır. Eyni zamanda, midi, geyimlərdə yarıqlar, dərin sinə dekoltesi, paltarların bəlli bir hisslərində dəliklərin olması. Bunlar tendensiya – dəbin təqdim etdiyi geyim nümunələridir.

Sadaladıqlarımı yaz-yayda dəbdi deyə istifadə edən də olacaq. Sonra geyimlərdə saçaqlardan istifadə, tulumlar, qısa top maykalar, ətəklər, gül naxışları olan parçalar bu il yazın dəbi nümunələrindəndir”.

Modelyer cins parçaları dəbin ayrılmaz hissəsi adlandırıb:

“Cins parçalardan hazırlanan geyimlər yenə gündəmdə olacaq. Mütləq ki, cinslərdən hazırlanan geyim nümunələrindən istifadə edirik. Çünki bu çox rahatdır. Bütün dünyada cinslərdən hazırlanan geyimlər çox aktualdır. İnanmıram ki, bu geyimlər gündəmdən getsin”.

Gülnarə Xəlilovanın ümumi dəyərləndirməsinə görə, dəri və cinsin sintezindən hazırlanmış geyimlər dəbdə olacaq:

“Dəridən və dəri əvəzedicilərindən hazırlanmış geyim nümunələri yenə də gündəmdədir. Hələ də öz yerini qoruyub, saxlayır. Bu il dərinin daha çox fərqli və tünd rəngləri aktual olacaq. Hətta dəri parçaların digərləri ilə sintezi kombin şəkilində təqdim olunacaq. Belə deyim ki, cins və dəri parçalar sintez olunaraq kombin ediləcək.

Baxmayaraq ki, yaz-yaydan danışırıq, amma qara rəng də dəbdə olan çalarlar siyahısındadır. Ümumiyyətlə, qara, qırmızı, ağ rəng illərdi öz mövqeyini qoruyub saxlayır”.