Politoloq Elşən Nəsibovun “İnkişaf və sülh ideyaları” kitabı çapdan çıxıb

Siyasi elmlər üzrə fəlsəfə doktoru, politoloq Elşən Nəsibovun “İnkişaf və sülh ideyaları. IV kitab” adlı yeni kitabı çapdan çıxıb.

Lent.az-ın xəbərinə görə, iki fəsildən ibarət kitab bundan əvvəl çap olunan eyni adlı üçcildlik əsərin davamıdır.

Birinci fəsildə inkişaf və sülh ideyalarının əsasları fəlsəfi və elmi aspektlərlə izah olunur, inkişaf və sülh kriteriyalarının şərtləndirici vəhdət məzmunu açılır, sülh və inkişaf haqqında sinergizm məzmunlu fikirlər bildirilir, reallıqla ideallıq arasında üzvi vəhdətin mövcudluğu nəzəri baxımdan izah olunur. Həmçinin Azərbaycanda sülh və inkişafın ardıcıl qaydada davam etməsi üçün yeni ideyalar öz əksini tapır.

Bu kitabın digərlərindən fərqləndirici xüsusiyyəti həm də ondan ibarətdir ki, ikinci fəsildə təbiət və kainat haqqında hipotetik düşüncələr yer alır. Kitab sosioloqlar, siyasətşünaslar, siyasətçilər, psixoloqlar, təbiət fəlsəfəsi ilə maraqlananlar və geniş oxucu kütləsi üçün faydalı ola bilər.

Qeyd edək ki, bu, politoloq Elşən Nəsibovun sayca 14-cü kitabıdır.