“İlk dəfə bu il 6 min şagird imtahan nəticələrindən narazılıqlarını bildirib. Bunun səbəbi də imtahanı təcrübəsi olmayan tələbələrin yoxlamağıdır”.
Bu sözləri Lent.az-a təhsil eksperti Kamran Əsədov deyib.
Bu il 9-cu və 11-ci sinif şagirdlərindən bir çoxu buraxılış imtahanının nəticələrindən narazı qalıb. Situasiya tipli sualların qiymətləndirilməsindən narazı olan şagirdlər apelyasiyaya şikayət verib. Belə ki, ümumilikdə bir imtahan üzrə 6 min şagird apelyasiyaya müraciət edib.
Maraqlıdır, nəticələrdən bu qədər narazılıqların səbəbi nədir?
İmtahan nəticələrindən narazılıqların səbəblərini açıqlayan təhsil eksperti vurğulayır ki, yoxlama zamanı bəzən biliyin qiymətləndirmə meyarlarına düzgün riayət edilməyib:
“İlk növbədə qeyd edim ki, cari ildə 9 və 11-ci siniflər üçün keçirilən buraxılış imtahanları kifayət qədər ciddi narazılıqlara səbəb olub. Belə ki, imtahanların keçirilməsindən sonra situasiya tipli test tapşırıqlarının yoxlanılmasında ciddi qüsurlar ortaya çıxıb. Öncədən müəyyənləşdirilən standartlar və meyarlar yoxlayanlar tərəfindən müvafiq yanlışlığa yol verilib. İlk dəfə bu il 6 min şagird imtahan nəticələrindən narazılıqlarını bildirib. Təbii ki, imtahanların yoxlanılmasına təcrübəsiz tələbələrin cəlb edilməsi öz mənfi təsirini göstərib. Tələbələr müəllimlərdən fərqli olaraq yoxlama zamanı bəzən biliyin qiymətləndirmə meyarlarına düzgün riayət etməyiblər”.
O, markerlərin çox pul qazanmaq üçün nəticələri sürətlə yoxladığını bildirib:
“Bu gün ali təhsil müəssisənin 4-cü kursda oxuyan tələbə qəbul imtahanı yoxlamaq imkanına malik deyil. Düzdür, DİM onları müəyyən təlimlərə cəlb edib, meyarları izah edir. Amma reallıq odur ki, onlar qısa müddətdə zəruri məlumatlara yiyələnə bilmirlər. Çünki imtahanlarda müxtəlif növ test tapşırıqlarından istifadə edilir. Marker müəyyən edilmiş vaxt ərzində bəzən daha çox pul əldə etsin deyə cavabları sürətlə yoxlayır, meyarlara baxmadan qiymətləndirir. Çünki DİM hər yoxlanılan testə görə vəsait ödəyir. Hesab edirəm ki, bu yanlış addımdır. Yoxlama prosesinə mütəxəssislər cəlb edilməlidir.
Bununla yanaşı, bu ilin buraxılış imtahanları onu göstərdi ki, biz situasiya tipli tapşırıqları çıxarmalıyıq. Yoxlama prosesində insan faktoru olacaqsa, yəni insanın subyektiv qiymətləndirilməsi tətbiq edilsə, bir mənalı şəkildə nəticələrdə mənfi hallar olacaqdı. Buna görə də situasiya tipli suallar çıxardılmalıdır. Bunlar tələbələrə ehtiyac olan balın aşağı düşməsinə gətirib çıxarır”.
Bu da belə... Kimdir müqəssir?
Bizi Telegram-da izləyin
t.me/lent_az
Bizi Instagram-da izləyin
Bizi Facebook-da izləyin
Bizi Twitter-da izləyin
