Prezident Cəlilabadda səfərdədir - YENİLƏNİB
04 sentyabr 2013 20:31 (UTC +04:00)

Prezident Cəlilabadda səfərdədir - YENİLƏNİB

Prezident İlham Əliyev Biləsuvara səfərini başa çatdıraraq, Cəlilabad rayonuna gəlib.

APA-nın məlumatına görə, dövlət başçısı əvvəlcə Cəlilabad şəhərinin mərkəzindəki Heydər Əliyev Parkında Heydər Əliyevin abidəsi önünə gül dəstəsi qoyub. Cəlilabad rayon icra hakimiyyətinin başçısı Əziz Əzizov parkda aparılan abadlıq-quruculuq işləri barədə prezident İlham Əliyevə məlumat verib. Burada yenidənqurma işlərinə bu ilin mayında başlanılıb. İşlər qısa müddətdə yüksək keyfiyyətlə başa çatdırılıb. Heydər Əliyevin parkda ucaldılan abidəsi yenisi ilə əvəz olunub. Qranitdən hazırlanmış yeni abidənin hündürlüyü 10 metrdir. Ümumi ərazisi 3 hektar olan bu istirahət məkanında iki fəvvarə quraşdırılıb, müasir işıq dirəkləri və oturacaqlar qoyulub, yaşıllıq zolağı salınıb. Parkın ətrafında yerləşən bütün binalar təmir edilib.

 

Azərbaycan prezidenti Cəlilabadda “Fidan” körpələr evi-uşaq bağçasının açılışında iştirak edib. Dövlət başçısı binanın rəmzi açılışını bildirən lenti kəsib. Azərbaycan prezidenti binada yaradılan şəraitlə tanış olub.
Körpələr evi-uşaq bağçasında Heydər Əliyevin, prezident İlham Əliyevin və Heydər Əliyev Fondunun prezidenti Mehriban xanım Əliyevanın uşaqlara diqqət və qayğısını əks etdirən fotolardan ibarət guşələr var.

 

Binanın inşasına bu ilin fevralında başlanılıb. Tikinti işlərinin yüksək keyfiyyətlə həyata keçirilməsi üçün bütün qüvvələr səfərbər olunub. 120 yerlik müasir tipli körpələr evi-uşaq bağçasının ümumi ərazisi 2,5 hektara yaxındır. Binada 20 otaq var. Burada həkim otağı, yeməkxana və uşaqların əyləncəsi üçün zal inşa edilib. Bundan başqa, musiqi zalı və digər istirahət otaqları da balacaların ixtiyarına veriləcək. Bütün otaqlar zəruri avadanlıqla təchiz edilib. Burada uşaqların təlim-tərbiyəsi və bacarıqlarının üzə çıxarılması üçün hərtərəfli şərait yaradılıb. Binanın həyətində müasir standartlara cavab verən attraksionlar quraşdırılıb, ətrafda geniş abadlıq işləri aparılıb.

 

 

Azərbaycan prezidenti İlham Əliyev Cəlilabad Rayon Mərkəzi Xəstəxanasının açılışında iştirak edib. Dövlət başçısı tibb ocağının rəmzi açılışını bildirən lenti kəsib. Səhiyyə naziri Oqtay Şirəliyev xəstəxanada yaradılan şərait barədə Prezident İlham Əliyevə məlumat verib. Xəstəxana ərazisində əsas binadan əlavə yoluxucu xəstəliklər üçün ikimərtəbəli infeksion şöbə tikilib. Həyətdə geniş abadlıq işləri görülüb, yaşıllıq zolaqları yaradılıb. Cəlilabad Rayon Mərkəzi Xəstəxanasının inşasına Prezident İlham Əliyevin 2012-ci ildə imzaladığı sərəncama əsasən başlanılıb. Səhiyyə Nazirliyinin sifarişi ilə inşa edilən bina ən müasir tələblər səviyyəsində tikilib. Xəstəxananın ümumi ərazisi 5 hektar, tikintialtı sahəsi isə 7381 kvadratmetrdir. Üç mərtəbədən ibarət binada ən müasir tibbi avadanlıq quraşdırılıb. Xəstəxanada laboratoriya, poliklinika şöbələri, rentgen, USM, əməliyyat otaqları, reanimasiya-anesteziologiya şöbəsi, mama-ginekoloji, uşaq xəstəlikləri şöbələri və inzibati otaqlar var. Burada nevrologiya və cərrahiyyə şöbələri də fəaliyyət göstərəcək. Tibb ocağının 50 nəfərlik iclas zalı da var. Xəstəxana müasir tələblərə cavab verən tibb avadanlığı ilə təmin olunub. Xəstəxanada yaradılan şəraitlə tanışlıqdan sonra dövlətimizin başçısı tibb işçiləri və rayon ictimaiyyətinin nümayəndələri ilə görüşüb. Həkim Nəzakət Nəzərli Azərbaycan Prezidentinə rayon sakinləri adından minnətdarlığını çatdırıb. Sonda xatirə şəkli çəkdirilib.

 

Prezident İlham Əliyev həmçinin Qarazəncir-Qarakazımlı-Bayxanlı avtomobil yolunun açılışında iştirak edib. Dövlət başçısı yolun tikinti işlərinin gedişini, eləcə də texniki göstəricilərini əks etdirən stendlərə baxıb.

 

Qeyd edilib ki, Qarazəncir-Qarakazımlı-Bayxanlı yolunun tikintisinə 2012-ci ilin oktyabrında başlanılıb. Bu yol bir neçə yerdə sürüşmə zonasına düşdüyü üçün hündürlüyü 2-3 metrlik yamaclar kəsilib, sürüşmə zonasından 10 metr kənarlaşdırılıb. Yol 25 yaşayış məntəqəsini birləşdirir. Bu yolun istifadəyə verilməsi 50 mindən çox əhaliyə müasir səviyyəli nəqliyyat infrastrukturundan yararlanmağa imkan verəcək.
 

 

# 736
avatar

Oxşar yazılar