Rusiya NATO ilə müharibəyə hazırlaşır - Putin

Prezident Vladimir Putin Rusiya Müdafiə Nazirliyinin kollegiya iclasında çıxış edərək, silahlı qüvvələrin qarşısında duran əsas vəzifələri açıqlayıb və NATO-nun fəaliyyətinə cavab verməyə hazır olmağın vacibliyini bəyan edib.

Lent.az-ın xarici mediaya istinadla məlumatına görə, dövlət başçısı strateji nüvə qüvvələrinin gücləndirilməsinin və yüksək dəqiqlikli uzaqmənzilli silah sistemlərinin seriyalı istehsalının artırılmasının vacibliyini vurğulayıb. Onun sözlərinə görə, Rusiya silahlı qüvvələri Ukraynada döyüş bölgəsində strateji təşəbbüsü saxlayır və 2024-cü ildə 189 yaşayış məntəqəsini azad edib.

Putin həmçinin qeyd edib ki, hər gün 1000-dən çox insan könüllü olaraq orduda xidmət etmək üçün müqavilə imzalayır və bu, vətəndaşların ölkənin müdafiə qabiliyyətini dəstəkləməyə yüksək səviyyədə hazır olduğunu təsdiqləyir.

NATO-nun hərəkətlərinə gəlincə, prezident alyansı Rusiya sərhədləri yaxınlığında və dünyanın digər regionlarında hərbi mövcudluğunu gücləndirməkdə ittiham edib. O, Avropadakı Amerika qoşunlarının sayının 100 min nəfəri keçdiyinə diqqət çəkib.

“ABŞ orta mənzilli raketləri yerləşdirməyə başlasa, Rusiya bu sahədə könüllü məhdudiyyətlərdən əl çəkməyə hazırdır”, - o əlavə edib.