Ermənilərə qalan sərvət

Ekologiya və Təbii Sərvətlər Nazirliyi Xocalı ərazisindəki təbii ehtiyatların həcmini açıqlayıb

Sahəsi 93688 hektar olan Xocalı rayonu işğalından 17 il keçir. Yeraltı və yerüstü təbii ehtiyatlarla zəngin Xocalı 1992-ci il fevralın 26-dan işğal altındadır. Ekologiya və Təbii Sərvətlər Nazirliyi rayonun təbii ehtiyatları barədə hesablama aparıb.

Nazirlikdən Lent.az-a bildiriblər ki, 32 min kubmetrlik Zərinbağ və Ağçay üzlük daşı yataqlarının 2039 min kubmetri istismar olunub. Bundan başqa rayonda ümumi ehtiyatları 12 min 434 min ton olan qırmadaş və əhəng istehsalına yararlı Şuşa əhəngdaşı yatağı, 962 min kubmetr ehtiyata malik kərpic istehsalına yararlı Xocalı gil yatağı, 7280 min kubmetrlik Xankəndi (Əskəran qrupu) qum-çınqıl qarışığı yatağı, gündəlik istismar ehtiyatları 9 min kubmetr olan Xankəndi yeraltı şirin su yatağı mövcuddur.

Nazirlikdə bildirirlər ki, Xocalı rayonunun Bədərə çayı hövzəsində “Yeddi kilsə” adlanan ərazidə - Pirkal meşəçiliyində fıstıq-palıd meşələri xüsusi olaraq qorunurdu. Yeraltı su ehtiyatlarını öyrənmək məqsədilə 1982-1983-cü illərdə rayonun ərazisində hidrogeoloji tədqiqatlar aparılıb və 4 sahə üzrə yeraltı suların ehtiyatı ilkin olaraq, gündəlik 143,4 min kubmetr həcmində qiymətləndirilib. 1990-cı ildə Xankəndi şəhərinin su təchizatı ilə əlaqədar keçmiş SSRİ-nin Geologiya Komitəsində gündəlik 48,3 min kubmetr həcmində Qarqarçayın məcraaltı (39,3 min m3/gün) və Yura çöküntülərinin (9 min m3/gün) yeraltı su ehtiyatları təsdiq olunub.

Elxan SALAHOV