“Moskva solistləri” Qəbələdə

Heydər Əliyev Fondunun təşkilatçılığı, Mədəniyyət və Turizm Nazirliyinin təşkilati dəstəyi ilə keçirilən Qəbələ IV Beynəlxalq Musiqi Festivalı davam edir. Lent.az-ın məlumatına görə, Azərbaycan və dünya klassik musiqisinin yüksək səviyyədə təbliğ olunduğu festival çərçivəsində keçirilən konsertlərə hər gün musiqi dünyasının yeni simaları, solistlər, dirijorlar, vokalçılar, müxtəlif ölkələrdən klassik musiqi kollektivləri qatılır.

Avqustun 1-də musiqisevərlər səbirsizliklə gözlədikləri Rusiyanın "Moskva solistləri" orkestrinin konsertini izləyiblər. "Yeni Rusiya" Dövlət Simfonik Orkestrinin bədii rəhbəri və baş dirijoru, "Moskva solistləri" kamera ansamblının yaradıcısı, "Qremmi" mükafatının sahibi Yuri Başmetin rəhbərliyi ilə keçirilən konsertdə E.Qriqin "Holberq zamanları" süitası, İ.Starvinski və F.Şubertin viola və simli alətlər üçün əsərləri, P.Çaykovskinin "Serenada"sı səsləndiriblər.

Yüksək peşəkarlıqla təqdim olunan musiqi əsərləri tamaşaçıların zövqünü oxşamış və alqışlarla qarşılanıb.