Yaşar Nuri Bakıya qayıtdı

Türkiyənin Amerika Xəstəxanasında müalicə olunan Azərbaycanın xalq artisti, Azərbaycan Dövlət Akademik Milli Dram Teatrının aktyoru, “Şöhrət” ordenli Yaşar Nuri vətənə qayıdıb. Bu barədə Lent.az-a xalq artistinin həyat yoldaşı Rəhimə Nuriyeva məlumat verib. Onun sözlərinə görə, Yaşar Nuri bu gün səhər saatlarında Bakıya gəlib.

Rəhimə Nuriyeva deyib ki, xalq artisti müalicə aldığı xəstəxananın həkimləri ilə birlikdə gəlib. Yaşar Nurinin hazırda özünü yaxşı hiss etdiyini söyləyən Rəhimə Nuriyeva bildirib ki, xalq artisti müayinə olunmaq üçün bir müddət sonra yenidən Türkiyəyə aparılacaq.

Qeyd edək ki, Yaşar Nuri ötən ilin noyabrından müalicə kursu keçir. Bakıda Mərkəzi Gömrük Xəstəxanasında müalicə aldıqdan sonra Türkiyənin Amerika Xəstəxanasında müalicəsini davam etdirib. İyunun 23-də Bakıya qayıdan xalq artistinin qəflətən hərarəti qalxdığı üçün o, yenidən Gömrük xəstəxanasına yerləşdirilib. İyulun 10-da isə yenidən Türkiyəyə aparılıb.

Jalə