Azərbaycan “Şərq bazarı” Beynəlxalq müsabiqə-festivalında

Azərbaycanın tanınmış estrada müğənnisi Ayaz Qasımov və bəstəkar Vüqar Camalzadə ölkəmizi “Şərq bazarı” Beynəlxalq müsabiqə-festivalında təmsil edəcək. Mədəniyyət və Turizm Nazirliyinin Beynəlxalq əlaqələr və mədəniyyət proqramları şöbəsindən Lent.az-a verilən məlumata görə, festival Türkiyənin Dövlət Radio və Televiziyası, Ukraynanın və Türkiyənin Mədəniyyət və Turizm nazirlikləri, Krım Muxtar Respublikasının Mədəniyyət və İncəsənət Nazirliyi və TÜRKSOY-un təşkilatçılığı ilə həyata keçiriləcək.

Festival 22-26 sentyabr tarixlərində Ukraynanın Krım Muxtar Respublikasının Yalta şəhərində baş tutacaq. Müasir estrada musiqisinin təşviqi məqsədilə təşkil olunan “Şərq bazarı” festivalında dünyanın 35 ölkə nümayəndəsinin iştirak edəcəyi gözlənilir.

Müsabiqənin Qran-pri mükafatını alana 5000 (beş min) ABŞ dolları, digər mükafat sahiblərinə isə diplom təqdim olunacaq. Eyni zamanda, festivalın təşkilatçılarından biri olan TÜRKSOY, təşkilat tərəfindən müəyyənləşdirilən bir iştirakçıya 5000 (beş min) ABŞ dolları məbləğində xüsusi “TÜRKSOY mükafatı” təqdim edəcək.

Xəyalə