Hamlet Xanızadənin xatirə gecəsi keçirilib

Lent.az-ın məlumatına görə, tədbirdə kinoşünas Aydın Kazımzadə, rejissorlar Ramiz Həsənoğlu, Ənvər Əbluc, Əbdül Mahmudbəyov, xalq artistləri Azərpaşa Nemətov, Rafiq Əzimov, aktyor Şamil Süleymanov, eləcə də Hamlet Xanızadənin digər sənət dostları və ailə üzvləri iştirak edib.

Gecə Hamlet Xanızadənin həyat və yaradıcılığından bəhs edən videomaterialın nümayişi ilə başlayıb.

Dövlət Film Fondunun direktoru, əməkdar incəsənət xadimi Cəmil Quliyev Hamlet Xanızadənin həyat və yaradıcılıq yoluna nəzər salıb. Bildirib ki, Hamlet Xanızadə Azərbaycan kino tarixində , “Yeddi oğul istərəm”, “Axırıncı aşırım”, “Arxadan vurulan zərbə”, “O qızı tapın”, “Yaramaz”, “Qətl günü” kimi 80-ə yaxın filmdə yaddaqalan obrazlar yaradıb: “Hamlet Xanızadənin daxilində bir obraz var idi ki, bu simanı onun ifa etdiyi bütün rollarda görmək olar. O, müharibəyə, müharibəni törədənlərə nifrət edirdi. Ermənilərin Qarabağ torpağına iddialı olmaları, Qorbaçov hakimiyyətinin Bakıda törətdiyi 20 yanvar qırğını onun rahatlığını əlindən almışdı, nə evdə, nə də işdə özünə yer tapa bilmirdi”.

Mərasimdə Hamlet Xanızadənin çəkildiyi filmlərdən parçalar göstərilib. Film Fondun foyesində isə sənətkarın həyat və yaradıcılığını əks etdirən fotosərgi nümayiş etdirilib.

Xatırladaq ki, Hamlet Xanızadə 1990-cı ildə 48 yaşında dünyasını dəyişib.

Xəyalə