Şərurda alt paleolit dövrünə aid maddi-mədəniyyət nümunələri aşkarlanıb

Azərbaycan Milli Elmlər Akademiyasının (AMEA) Naxçıvan bölməsi Tarix, Etnoqrafiya və Arxeologiya İnstitutunun şöbə müdiri, AMEA-nın müxbir üzvü Vəli Baxşəliyevin rəhbərliyi ilə Naxçıvan arxeoloji ekspedisiyası Şərur rayonu ərazisində yerləşən Ovçulartəpəsi qədim yaşayış yerində qazıntı işlərini davam etdirir. Lent.az-ın AMEA-nın rəsmi saytına istinadən verdiyi məlumata görə, ərazidə aparılan tədqiqatlar zamanı alt paleolit dövrünə aid 3 əmək aləti aşkarlanıb. Əldə olunan alətlər Ovçulartəpəsi yaşayış yerinin nəinki Azərbaycanda, hətta dünyada ən qədim yaşayış yerlərindən biri olduğunu sübut edir.
Qeyd edək ki, Azərbaycan-Fransa ekspedisiyası tədqiqatlara avqustun əvvəllərindən başlamışdır. Ekspedisiya üzvlərinin bir qrupu Duzdağ ərazisində də kəşfiyyat xarakterli qazıntı işləri aparır. Arxeoloji qazıntılar sentyabrın sonunadək davam edəcəkdir.