1,3 ton saxta kolbasa məhv edildi

İqtisadi İnkişaf Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidməti “AY-MİN” MMC-yə 1,3 ton kolbasa məmulatını məhv edib.

Nazirliyin mətbuat xidmətindən Lent.az-a bildiriblər ki, bir müddət əvvəl Dövlət Xidməti tərəfindən Sumqayıt şosesi, 14-cü km ünvanında fəaliyyət göstərən “AY-MİN” MMC-də yoxlama aparılmışdı. Yoxlama zamanı müəssisədə istehsal edilən kolbasa məmulatlarının üzərində yararlılıq müddətinin normativ sənədlərlə müəyyən edilmiş müddətdən artıq göstərildiyi, kolbasa məmulatlarının uyğunluq və gigiyenik sertifikatları olmadan istehsal edildiyi, habelə kolbasa istehsalı və qablaşdırılmasında mənşəyi bəlli olmayan rəngləyici maddələr və qablaşdırma materiallarından istifadə olunduğu aşkarlanmışdı.

Bununla əlaqədar, uyğunluq və gigiyenik sertifikatları olmayan kolbasa məmulatlarının istehsalı və satışının dayandırılması və müəssisə tərəfindən ticarət şəbəkələrinə paylanmış malların geri yığılması, müəssisənin anbarında olan yararsız malların məhv edilməsi barədə “AY-MİN” MMC-yə icrası məcburi göstəriş verilib. Artıq müəssisənin anbarında satışı dayandırılmış 1,3 ton kolbasa məmulatı, həmçinin 20 kiloqram rəngləyici maddələr, qablaşdırma materialları və 49,1 kioqram etiket müvafiq qaydada məhv edilib.

Həmçinin haqsız rəqabətə yol verdiyinə görə “AY-MİN” MMC barəsində antiinhisar qanunvericiliyinin pozulması əlamətləri üzrə iş qaldırılıb.

Elxan SALAHOV