“Qanlı göl” nəzarətə götürülüb

2010-cu ilin III rübü ərzində Ekologiya və Təbii Sərvətlər Nazirliyinin “Qaynar xətt”inə (439-18-63, 438-13-35) tullantıların qalaqlanması və yandırılması ilə bağlı 20 müraciət daxil olub. Bütün müraciətlər nazirliyin müvafiq qurumlarının əməkdaşları tərəfindən yerində araşdırılıb.

Nazirliyin mətbuat xidmətindən Lent.az-a bildiriblər ki, müraciətlərdən 3-ü Binəqədi, 1-i Nəsimi, 2 Sabunçu, 1-i Xəzər, 3-ü Xətai, 2-si Nizami, 1-i Suraxanı, 1-i Yasamal rayonundan, 1-i Sumqayıt şəhərindən, yerdə qalanı isə digər rayon və şəhərlərdən daxil olub.

Nazirlikdə bildirirlər ki, müraciətlərdən biri Yasamal rayonu ərazisində yerləşən “Qanlı göl”ün ətrafında tullantıların yığılaraq yandırılması haqqında olub. Bu müraciət şikayətçi və 22 saylı Mənzil Kommunal İstismar Sahəsinin (MKİS) rəisinin iştirakı ilə araşdırılıb. Araşdırma zamanı əraziyə tikinti və məişət tullantılarının atıldığı müəyyənləşsə də, yandırılma faktı qeydə alınmayıb. Bununla əlaqədar nazirliyin əməkdaşları tərəfindən edilən ciddi xəbərdarlıqdan sonra 22 saylı MKİS tərəfindən həmin ərazi dərhal tullantılardan təmizlənib. Ərazi nazirlik tərəfindən nəzarətə götürülüb.

Elxan SALAHOV