Abunəçilərin “Azərenerji”yə 1,6 milyard manat borcu var

Hazırda elektrik enerjisi istehlakçılarının “Azərenerji” Açıq Səhmdar Cəmiyyətinə 1,6 milyard manat borcu var.

Lent.az-ın məlumatına görə, “Azərenerji” ASC-nin prezidenti Etibar Pirverdiyev jurnalistlər üçün keçirdiyi mətbuat konfransında belə deyib. Onun sözlərinə görə, borcların 1 milyard manatı əhali qrupu abonentlərin, 600 milyon manatı isə dövlət qurumlarının payına düşür.

Etibar Pirverdiyev bildirib ki, hazırda respublikada elektrik enerjisindən istifadə haqları 92 faiz təşkil edir. Onun sözlərinə görə, 3-4 il əvvəl bu rəqəm indikindən bir neçə dəfə aşağı olub: “Biz “Smartkart” tipli elektrik sayğaclarını Gəncə şəhərində quraşdırmağa başlayarkən buradakı abonentlərdən yığım səviyyəsi maksimum 15 faiz təşkil edirdi. İndi Gəncədə istifadə olunan elektrik enerjisinin dəyəri 100 faiz ödənilir. Üstəlik bu şəhərdə enerji təminatı da əhəmiyyətli şəkildə gücləndirilib və indi Gəncədə elektrik enerjisi problemi yoxdur”.

“Azərenerji”nin rəhbəri Nazirlər Kabinetinin qərarı ilə silinmiş borclara da aydınlıq gətirib. Onun sözlərinə görə, həmin qərarla “Azərenerji”nin 1,5 milyard manat borcu silinib. Bu borcların demək olar ki, hamısı kolxoz və sovxozların “Azərenerji”yə olan borclardan ibarətdir.

Elxan SALAHOV