“Mançester Yunayted” 200-ə yaxın əməkdaşı işdən çıxartdı

"Mançester Yunayted"in icraçı direktoru Ömər Berrada klubun strukturunun transformasiyası, bu çərçivədə 150-200 əməkdaşın işdən çıxarılacağı barədə danışıb.

Lent.az xəbər verir ki, bu barədə klubun rəsmi saytında məlumat yerləşdirilib.

“Biz Mançester Yunaytedin kişi, qadın və akademiya komandalarını qazanmaq üçün ən güclü mövqedə olmasının məsuliyyətini daşıyırıq. Klubu dəyişdirəcək və yeniləyəcək geniş spektrli fəaliyyətlərə başlayırıq. Təəssüf ki, bu, mümkün əlavə ixtisarların elanı deməkdir və biz bunun həmkarlarımıza göstərəcəyi təsirdən dərin təəssüflənirik. Ancaq bu çətin qərarlar klubu sabit maliyyə vəziyyətinə qaytarmaq üçün lazımdır.

Son 5 ildə ardıcıl olaraq maliyyə itkiləri ilə üzləşmişik. Bu davam edə bilməz. Bizim iki əsas prioritetimiz azarkeşlərimiz üçün meydanda uğur qazanmaq və klubun infrastrukturunu yaxşılaşdırmaqdır. Əgər biz daim pul itiririksə, bu məqsədlərə sərmayə qoya bilmərik. Bu prosesin sonunda dəyərli kommersiya tərəfdaşlarımıza yüksək keyfiyyətli xidmət göstərməyə davam edərək daha çevik, səmərəli və maliyyə cəhətdən sabit klubumuz olacaq. Bu, UEFA və Premyer Liqa qaydaları çərçivəsində qalaraq, komandanın uğurlarına daha yaxşı sərmayə qoymağa və azarkeşlər üçün şəraiti yaxşılaşdırmağa imkan verəcək”, - deyə klubun rəsmi saytı Berradanın sözlərini yayımlayıb.