"Barselona"nın Messini kluba qaytarmaq planı üzə çıxdı

"Barselona" rəhbərliyinin argentinalı hücumçu Lionel Messini kluba qaytarmaq planı məlum olub.

Lent.az bildirir ki, bu barədə “Diario Sport” məlumat yayıb.

Nəşrin məlumatına görə, Messini transfer etmək üçün Kataloniya klubu maaş fondunu azaltmalı və bir neçə futbolçunu satmalı olacaq. Maliyyə feyr-pleyinə riayət etmək üçün hücumçu vergilər çıxmadan ildə 25 milyon avro maaşla La Liqada qeydiyyatdan keçə bilər. Bu məbləğin argentinalının əvvəllər komandada aldığı maaşdan dörd dəfə az olduğu bildirilir. 2020/2021 mövsümündə o, müqaviləyə uyğun olaraq ildə 100 milyon avro alıb.

Aprelin 13-də “Catalunya Radio” Messinin “Barselona”ya qayıtmaq niyyətində olduğunu və bu mövzuda komandanın baş məşqçisi Xavi ilə əlaqə saxladığını bildirmişdi. Bir gün sonra jurnalist Fabrisio Romano bildirib ki, 2023-cü ilin mayında Messi ilə müqavilə imzalanacağı təqdirdə Kataloniya klubunun maliyyə feyr-pleyini pozub-pozmayacağı bəlli olacaq.

Messi 2021-ci ilin avqustunda PSJ ilə müqavilə imzalayıb, müqavilənin müddəti 2023-cü ilin iyun ayına qədər bir mövsümlük uzadılma variantı ilə. Bundan əvvəl hücumçu karyerası boyu "Barselona"da çıxış edib və bu komandada on dəfə İspaniya çempionu və dörd dəfə Çempionlar Liqasının qalibi olub.