Məleykə Əsədova səhhəti pisləşən qızından danışdı: “Xəstəxanaya yerləşdirmişik"

Xalq artisti Məleykə Əsədova səhhəti pisləşən qızı Gülərdən danışıb. Lent.az-a açıqlama verən aktrisa bildirib ki, qızı 3 saylı şəhər xəstəxanasına yerləşdirilib: “Qızım Güləri xəstəxanaya yerləşdirmişik. Qızdırması var idi. Təcili tibbi yardım maşınını gözləmədən öz maşınımızla xəstəxanaya çatdırdıq. Həkimlər müayinə etdi. Diaqnoz qoydular ki, sən demə qızıma bərk soyuq dəyib. Çox sağ olsun 3 saylı Sabunçu rayon xəstəxanasının baş həkimi Fikrət Zeynalov və pediatriya şöbəsinin həkimi Ramiz İsmayılov. Onlar qızıma kömək etdilər. Hazırda özünü yaxşı hiss edir. İnşallah, bu gün axşam radələrində qızımı evə aparacam. Sonda onu demək istəyirəm ki, Allah heç bir kəsin övladına qıymasın. Uşaqlar xəstələnməsin. Qızımın belə olması mənə də pis təsir elədi. Hazırda boğazım tutulub. Gülərin xəstələndiyini eşidən dost-tanış səhərdən zəng edir. Bizə görə narahat olan hər kəsə dərin minnətdarlığımı bildirirəm”.