Sabiq məhkumlar Bakıda polisi bıçaqladı - YENİLƏNİB

Daxili İşlər Nazirliyi Bakıda polisin bıçaqlanması ilə bağlı məlumat yayıb. Lent.az nazirliyin saytına istinadən xəbər verir ki, martın 14-də saat 05 radələrində Nəsimi rayonu ərazisində - Moskva prospektində Laçın rayon sakini, əvvəllər məhkum olunmuş Ayhan Səfərov və Abşeron rayon sakini, əvvəllər məhkum olunmuş Yalçın Cəfərov Bakı şəhər sakini Nicat Tahirova məxsus “VAZ-2107” markalı avtomobildən oğurluğa cəhd göstərərkən Nəsimi RPİ PPX-nin əməkdaşları tərəfindən yaxalanıb. Bu zaman Y.Cəfərov bıçaqla polis serjantı Samir Paşayevə əl nahiyəsindən xəsarət yetirib. Nəsimi RPİ 19-cu PB-yə gətirilmiş A.Səfərovun və Y.Cəfərovun ətrafında aparılmış əməliyyat tədbirləri ilə onların həmin gün paytaxt sakini Elçin Xəlilova məxsus “Mercedes” markalı avtomobildən şüşəsini sındırmaq yolu ilə oğurluğa cəhd göstərmələri, eləcə də Yalçın Cəfərovun Cinayət Məcəlləsinin 185-ci maddəsi ilə axtarışda olması da müəyyən edilib.

*****

11:47

Bakıda oğurluq etmək istəyən şəxs polisi bıçaqlayıb.

Nəsimi rayon Polis İdarəsindən APA-ya verilən məlumata görə, hadisə Moskva prospekti 78 ünvanında qeydə alınıb. Laçın rayon sakini Ayxan Səfərov və Abşeron rayon sakini Yalçın Cəfərov Nicat Tahirova məxsus “VAZ-2107” markalı avtomobildən oğurluğa cəhd edərkən ərazidə xidmət aparan polis əməkdaşları tərəfindən tutulublar. Bu zaman Y. Cəfərov bıçaqla polis əməkdaşına xəsarət yetirib.

Araşdırmalar zamanı saxlanılan şəxslərin həmin gün A.Məhərrəmov küçəsi ev 33 “B”nin qarşısında Elçin Xəlilova məxsus “Mercedes” markalı avtomobildən şüşəsini sındırmaq yolu ilə oğurluğa cəhd göstərmələri də müəyyən edilib.