Qazaxıstan sərhədçiləri azərbaycanlı balıqçıları tutublar

Gəmidə 4 “Yamaha” mühərriki, peyk əlaqəsi qurğuları, osetrin cinsindən “kalada” tipli balıqları tutmaq üçün qadağan olunmuş tilovlar aşkarlanıb

Qazaxıstan Respublikasının Milli Təhlükəsizlik Komitəsinin Sərhəd Xidmətinin Regional Sahil Mühafizəsi İdarəsinin sərhədçiləri Xəzər dənizi sahilindəki Tokmak burnu rayonunda Azərbaycanın 4 vətəndaşını saxlayıblar.

Lent.az-ın idarənin mətbuat xidmətinə istinadən verdiyi məlumata görə, saxlanılanlar kiçik ölçülü “baydak” tipli balıqçı gəmisində olublar.

Gəmidə 4 “Yamaha” mühərriki, peyk əlaqəsi qurğuları, osetrin cinsindən “kalada” tipli balıqları tutmaq üçün qadağan olunmuş tilovlar yerləşdirilib. Hazırda saxlanılan Azərbaycan vətəndaşlarının şəxsiyyətləri və Qazaxıstana gəlişlərinin məqsədi araşdırılır.