Slutskidən dünyanın diqqətini çəkən KİMYƏVİ SİLAH AÇIQLAMASI

“Rusiyada 2017-ci ildən bəri kimyəvi silah yoxdur”.

Lent.az xəbər verir ki, bunu Rusiya Dövlət Dumasının Beynəlxalq Əlaqələr Komitəsinin rəhbəri Leonid Slutski Duma TV-nin İnstaqram səhifəsindəki canlı yayımda bildirib.

Komitə sədrinin sözlərinə görə, dediklərini Kimyəvi Silahlara Qadağa Təşkilatı və ekspert qiymətləndirmələri də təsdiqləyir:

“Rusiyada 2017-ci ildən bəri kimyəvi silahın olmaması sözügedən beynəlxalq təşkilat və ekspertlər tərəfindən dəfələrlə təsdiqlənib. Rusiya bu sahədə götürdüyü öhdəlikləri yerinə yetirib”.

Slutski, həmçinin, Rusiya Federasiyasında gizli bir kimyəvi silahın mövcudluğu barədə Qərbdən verilən açıqlamaların yorucu olduğuna da diqqət çəkib. O, ABŞ-ın Suriya və İraqla bağlı oxşar açıqlamalar verdiyini xatırladıb. Bildirib ki, məlumatlar Vaşinqton tərəfindən yayıldığından, digər Qərb ölkələri bu məsələnin mahiyyətinə varmadan gündəmdə saxlayırlar:

“İndi isə Skripaçların zəhərlənməsi ehtimalı, Navalnının zəhərlənməsi iddiası – bu, mütləq bir uydurmadır. Navalnı zəhərlənmədən xilas edildi. İndi bütün bu hiyləgər addımlara bir növ əsas olaraq, bizdən əslində çoxdan məhv edilmiş kimyəvi silahların məhv edilməsini tələb edirlər”.

Qeyd edək ki, bundan əvvəl media ABŞ Dövlət Departamentinin Rusiyanı kimyəvi silahları məhv etməyə çağırdığını yazmışdı.