Bakı-2019: Həndbolçularımız mükafatçılar sırasına düşmək şanslarını itirdilər

Bakı-2019 XV Avropa Gənclər Yay Olimpiya Festivalında həndbol yarışlarında II turun oyunlarına start verilib.

APA-nın məlumatına görə, ilk turda İsveçrəyə 16:34 hesabı ilə uduzan qızlardan ibarət Azərbaycan milli komandası növbəti görüşünü Macarıstan qarşı keçirib.

Oyun B qrupunda yer alan yığmamız üçün yenə uğursuz alınıb. İlk hissəni 22:13 hesabı ilə öndə bitirən rəqib yekunda 47:23 hesablı qələbə qazanıb.

Qrupumuzun digər görüşündə isə İsveçrə Çexiyaya 40:24 hesabı ilə qalib gəlib.

Beləliklə, ikinci turdan sonra İsveçrə və Macarıstan yarımfinala vəsiqə qazanıb. Hər iki qarşılaşmadan 2 xalla ayrılan komandalar sabah öz aralarında qrup qalibini müəyyənləşdirəcəklər. Mükafatçılar sırasına düşmək şansını itirən Azərbaycan yığması isə 5-8-ci yerlər uğrunda oynayacaq.

Qeyd edək ki, qrup mərhələsində Çexiya ilə millimizin oyunu sabah 14:30-da başlayacaq.