Müəllimlərin maaşı artırılır - BU ŞƏRTLƏ

Müəllimlərin əməkhaqqının artırılması

Sertifikatlaşdırma prosesinin nəticələrinə uyğun olaraq, müəllimlərin əməkhaqları artırılacaq.

Lent.az xəbər verir ki, bunu Məktəbəqədər və Ümumi Təhsil üzrə Dövlət Agentliyinin Ümumi təhsilin təşkili şöbəsinin müdir müavini Nurlan İsmayılbəyli deyib.

Sertifikatlaşdırma prosesinin məqsədi və nəticələri

O bildirib ki, prosesi uğurla tamamlayan və ya tamamlamayan kateqoriyalar var: "Qiymətləndirmənin məqsədi prosesə cəlb olunmuş şəxsləri bir-birindən fərqləndirməkdir".

N. İsmayılbəyli qeyd edib ki, artıq sertifikatlaşma prosesini uğurla tamamlayanların sayı 55 mini keçib. Onların 17 mindən çoxu əməkhaqqını 35 faiz əlavə ilə, 38 mini isə 10 faiz əlavə ilə alır.

İmtahanların keçirilməsi və qiymətləndirmə qaydaları

“Cari ildə, Naxçıvan da daxil olmaqla, ölkənin 19 şəhərində bu imtahanı təşkil edəcəyik. Proses elektron formatda olur. Bitən kimi müəllimlər nəticələri, doğru və yanlış cavabları görə bilərlər. İmtahandan sonrakı appelyasiya mərhələsi də elektron formatda olur və qısa zamanda həyata keçirilir”, - o əlavə edib.

60 yaşdan yuxarı müəllimlərin imtahanı

N.İsmayılbəyli həmçinin 60 yaşdan yuxarı müəllimlərin imtahan verməsi məsələsinə də toxunub: "Müəllimlərin sertifikatlaşdırma prosesində 60 yaşdan yuxarı şəxslərin iştirakı könüllüdür. Amma daha əvvəl prosesi uğurla tamamlayıb işinə davam edən 60 yaşdan yuxarı şəxslərin yenidən imtahandan keçməsi mütləqdir".

İkili ixtisası olan müəllimlərin sertifikatlaşdırılması

O, eyni zamanda, qeyd edib ki, ikili ixtisası olan təhsilverənlərin bir fənn üzrə imtahandan keçməsi kifayətdir. Məsələn, riyaziyyat və informatika fənnini tədris edən müəllimlər riyaziyyat fənni üzrə imtahandan keçibsə, informatikadan imtahan verməsinə ehtiyac yoxdur.