Bu adanın sakinləri Yeni ili digərlərindən 12 gün gec qeyd edirlər

Dünyanın bir çox ölkəsi Yeni ili dekabrın 31-dən yanvarın 1-nə keçən gecə qeyd edir.

Lent.az-ın xarici mediaya istinadla məlumatına görə, bununla belə, Böyük Britaniyada bir ucqar ada var ki, sakinləri yanvarın 13-dən 14-nə keçən gecə bayramı qeyd edirlər.

Qeyd olunur ki, Fula adası Şotlandiyanın Şetland adaları arxipelaqında yerləşir. Böyük Britaniyanın qalan hissəsindən fərqli bir gündə Yeni ili qeyd edən cəmi 35 sakin var.

İş burasındadır ki, Fula Qriqorian təqviminə deyil, Yulian təqviminə əməl edir. Buna görə də ada Milad və Yeni ili Böyük Britaniyanın qalan hissəsindən 12 gün gec qeyd edir.

Fulanın digər özəlliyi isə adanın milli elektrik şəbəkəsinə qoşulmamasıdır. Wi-Fi, pablar, barlar və ya mağazalar yoxdur. Yerli sakinlər dəniz və ya hava nəqliyyatından istifadə edirlər.

Buna baxmayaraq, adada turistləri cəlb edən çoxlu sayda attraksion və əyləncə var. Bu, xüsusilə oktyabrın ortaları ilə martın ortaları arasında şimal işıqlarını görmək üçün əla yerdir.

Fula çoxlu vəhşi heyvanların və qoyunların evidir.

Qoyunların idxalına uzun müddət qoyulan qadağadan sonra adada ev heyvanlarının çarpazlaşdırılması aparılmayıb, bu da onların bütün populyasiyasının tamamilə unikal olmasına və tez-tez müxtəlif yun rəngləri ilə xarakterizə olunmasına səbəb oldu.

Fula həm də sahillərində çoxsaylı gəmi qəzaları səbəbindən məşhur bir dalğıc yeridir. Quru yerdə qalmağa üstünlük verənlər üçün bələdçili gəzinti turları mövcuddur.

Nəşr bildirib ki, Fulaya Şetland adalarının materik hissəsindən bərə və ya təyyarə ilə çatmaq olar. Adada yeməkxana kirayə verilir, lakin turistlər öz yeməklərini gətirməlidirlər.