Ali və orta ixtisas məktəblərinə sənəd qəbulu başa çatdı

Tələbə olmaq istəyənlərin sayı keçən illə müqayisədə azalıb

2009/2010-cu tədris ili üçün Azərbaycan ali məktəblərinə və orta təhsil bazasından (11 illik) orta ixtisas məktəblərinə keçiriləcək qəbul imtahanlarında iştirak etmək istəyən abituriyentlərin ərizələrinin qəbulu başa çatıb. Bu barədə Lent.az-a Tələbə Qəbulu üzrə Dövlət Komissiyasının (TQDK) İctimaiyyətlə əlaqələr şöbəsindən bildirilib.
Ərizələrin qəbulu aprelin 21-dən mayın 31-dək aparılıb və bu müddət ərzində TQDK-nın serverinə 117531 “Elektron ərizə” daxil olub.
“Elektron ərizə” qəbulu ilə bağlı ilkin məlumatlara əsasən Sənəd Qəbulu Komissiyalarında 114274 abituriyent “Elektron ərizə”sini təsdiq etdirib (2008-ci ildə ərizələrin sayı 116520 olmuşdu).
Xüsusi qabiliyyət tələb edən ixtisasları seçən 7574 abituriyent Qabiliyyət İmtahan Komissiyalarında qeydiyyatdan keçiblər.
I ixtisas qrupu üzrə imtahanlarda iştirak etmək üçün 36221 abituriyent “Elektron ərizə”sini təsdiq etdirib.
II ixtisas qrupu üzrə 25354 abituriyent “Elektron ərizə”sini təsdiq etdirib.
III ixtisas qrupu üzrə imtahanlarda iştirak etmək üçün 36116 abituriyent “Elektron ərizə” sini təsdiq etdirib.
IV ixtisas qrupu üzrə imtahanlarda iştirak etmək üçün 16583 abituriyent “Elektron ərizə” sini təsdiq etdirib.
Qəbul imtahanlarında iştirak etmək arzusunda olan abituriyentlərdən 55884 nəfəri oğlan, 58390 nəfəri isə qızlardır. Onlardan 102211 nəfəri Azərbaycan bölməsinə, 12063 nəfəri isə rus bölməsinə sənəd verib.

Elxan SALAHOV