Sabah son zəngdir

Məktəblərdə təhlükəsizlik tədbirləri gücləndirilib

Sabah Azərbaycanın bütün ümumtəhsil məktəblərində son zəng tədbirləri keçiriləcək. Artıq Bakıdakı məktəblərin hamısında bayrama hazırlıq tədbirləri başa çatıb və hər bir məktəbin həyətində şagirdlərin şənlənməsi üçün lazımi şərait yaradılıb.

Bakı Şəhəri üzrə Təhsil İdarəsinin ictimaiyyətlə əlaqələr şöbəsinin rəhbəri Zəminə Əliqızı Lent.az-a açıqlamasında belə deyib. Onun sözlərinə görə, bayram tədbirləri ilə əlaqədar bu gün axşam saatlarından etibarən bütün məktəblərdə təhlükəsizlik tədbirləri gücləndirilib.

Zəminə Əliqızı deyib ki, şagirdlər üç saat ərzində məktəbin ərazisindən kənara çıxmamaq şərti ilə istədikləri kimi şənlənə biləcək. Saat 13.00-da isə son zəng tədbirləri başa çatacaq və bundan sonra şagirdlər valideynlərinin ixtiyarına veriləcək. Onun sözlərinə görə, son zəng günü məktəblilərə Milli Parkda ənənəvi gəzintiyə çıxmamaq tövsiyə olunub. Bu tövsiyəyə necə əməl edib-etməyəcəkləri isə şagirdlərin öz işidir.

“Bakı Şəhəri üzrə Təhsil İdarəsi həm valideynlərə, həm də məktəb rəhbərlərinə uşaqları gəzintiyə çıxmamasına icazə verməməyə çağırıb. Yəqin ki, şagirdlər də israr etməz. Ancaq bu məsələni hər bir məktəb rəhbərliyi valideynlərlə birgə həll etməlidir” – deyə, Zəminə Əliqızı bildirib.

Xatırladaq ki, 2008-2009-cu tədris ilində ölkəmizin orta ümumtəhsil məktəblərinin XI sinfini 112.549 şagird bitirəcək. XII sinfini başa vuran şagirdlərin sayı isə 637-dir. Təhsil Nazirliyinin məlumatına görə, növöəti dəs ilində I sinif şagirdlərinin sayının 125.114 nəfər olacağı proqnozlaşdırılır.

Elxan SALAHOV