Səyavuş Novruzov: “YAP-ın 2 namizədi qeydə alınmayıb”

İndiyədək parlament seçkilərinə Yeni Azərbaycan Partiyasından 115 nəfərin namizədliyi irəli sürülüb.

Lent.az-ın məlumatına görə, bu barədə YAP-ın icra katibinin müavini Səyavuş Novruzov jurnalistlərə açıqlamasında bildirib. Onun sözlərinə görə, YAP-ın irəli sürdüyü 115 namizəddən 113-ü Dairə Seçki Komissiyalarında qeydiyyata alınıb. 2 nəfər isə qeydiyyata alınmayıb. S.Novruzov deyib ki, qeydiyyata alınmayanların əvəzinə əlavə namizədlərin irəli sürülməsinə ehtiyac yoxdur.

İcra katibinin müavini bəzi namizədlərin seçkilərlə bağlı üzləşdiyi problemlərə münasibət bildirib. O qeyd edib ki, bu məlumatların heç bir əsası yoxdur. Sadəcə, hansısa namizədlər lazım olan arayışları ala bilməyən kimi dərhal bu barədə qəzetlərə, mətbuata açıqlamalar verirlər: “Hansı ki, o adamlar 30 gün ərzində imza toplaya bilməyiblər”.

S.Novruzov onu da bildirib ki, YAP öz namizədlərinin təşviqat prosesini təşviqat dövründə mərkəzləşdirilmiş qaydada maliyyələşdirəcək.

Elxan Salahov