Səfir Debnath Shav: “Hindistan Azərbaycanın ərazi bütövlüyünü tanıyır”

İqtisadi böhran Hindistanla Azərbaycan arasında iqtisadi əməkdaşlığa təsir etməyib
Ermənistan Azərbaycan Dağlıq Qarabağ münaqişəsinin həllində Hindistan dövlətinin mövqeyində heç bir dəyişiklik yoxdur. Lent.az-ın məlumatına görə, bu barədə Gəncəyə səfəri zamanı jurnalistlərə Hindistanın ölkəmizdəki səlahiyyətli səfiri Debnath Shav bildirib. O bir daha bəyan edib ki, Hindistan Azərbaycanın ərazi bütövlüyünü tanıyır.
Bundan başqa, səfirin bildirdiyinə görə, dünyada hökm sürən iqtisadi böhran Hindistanla Azərbaycan arasında iqtisadi əməkdaşlığa təsir etməyib. “Hindistanla Azərbaycan arasında ötən il ticarət dövriyyəsi 2,5 milyard dollar təşkil edib. Azərbaycanla iqtisadi əməkdaşlığı daha da artırmaq istəyirik. Hazırda Hindistan dövləti Azərbaycanın ticarət tərəfdaşları içərisində 4-cü sıradadır. Hindistan Azərbaycandan neft alır. Azərbaycana isə boksit kimyəvi maddəsi gəlir ki, bu da Gəncənin Gil Torpaq İstehsalat Birliyində istifadə edilir” - deyə səfir bildirib.
Vüsalə Cənnətova