ATƏT-də atəşkəs müzakirəsi həmsədrlərin narahatlığı ilə əlaqədardır

Azərbaycanın ATƏT yanındakı nümayəndəliyinin rəhbəri, ölkənin Avstriyadakı səfiri Fuad İsmayılov belə deyib
"Ermənistan və Azərbaycan arasındakı cəbhə xəttində atəşkəs rejiminin pozulması faktlarının çoxalması məsələsinin ATƏT-in Daimi Şurasının müzakirəsinə çıxarılması, ATƏT-in Minsk qrupunun həmsədr ölkələri - ABŞ, Fransa və Rusiyanın narahatlığından xəbər verir", - Azərbaycanın ATƏT yanındakı nümayəndəliyinin rəhbəri, ölkənin Avstriyadakı səfiri Fuad İsmayılov hesab edir.
ATƏT-in monitorinqi zamanı Ermənistan və Azərbaycan Silahlı Qüvvələrinin təmas xəttində baş vermiş son insident və atəşkəs rejiminin pozulması faktlarının çoxalması məsələsinə cümə axşamı Vyanada, ATƏT-in Daimi Şurasının iclasında baxılacaq", - bir müddət əvvəl jurnalistlərə ATƏT-in Minsk qrupunun rusiyalı həmsədri Yuri Merzlyakov deyib.
Fevralın 26-da Ermənistan və Azərbaycan Silahlı Qüvvələrinin təmas xəttində, Füzuli rayonunun Horadiz məntəqəsi yaxınlığında ATƏT missiyasının növbəti monitorinqinin keçirilməsi nəzərdə tutulmuşdu. Ancaq atəşkəs rejiminin pozulması səbəbindən bu, baş tutmayıb.
ATƏT-in hazırkı sədrinin şəxsi nümayəndəsi Anjey Kaspşik cəbhə xəttində atəşkəs rejiminin pozulması faktları haqqında hesabat hazırlayıb və onu ATƏT-in Daimi Şurasına təqdim edəcək.
"Bu sadəcə müzakirələrdir və orada heç bir qərar qəbul edilmir", - “Trend”ə İsmayılov deyib.
Burada söhbət ATƏT-in üzv ölkələrinin diqqətinin bu faktlara cəlb edilməsindən gedir.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. 1991-ci ilin dekabrında, Şuşa və Xocalı istisna olmaqla, Dağlıq Qarabağ Azərbaycanın nəzarətindən çıxıb. 1992-1993-cü illərdə Şuşa, Xocalı və Dağlıq Qarabağa bitişik yeddi rayon işğal olunub. 1994-cü ilin mayında tərəflər atəşkəs rejiminə dair razılaşma əldə ediblər və o vaxtdan bəri, ATƏT-in Minsk Qrupunun himayəsi altında, Rusiya, Fransa və ABŞ-ın həmsədrliyi ilə, hələ də nəticəsiz sülh danışıqları aparılır.