Rusiya Azərbaycan sərhədi yaxınlığında hərbi baza yaradır

Mahaçqala şəhərində Rusiyanın Xəzər Hərbi Donanmasının birləşmiş gəmi zərbə qrupunun bazası yaradılacaq.

APA-nın bildirdiyinə görə, bu barədə Rusiya KİV bu ölkənin Xəzər Hərbi Donanmasının qərargahına istinadən məlumat yayıb.

Artıq hərbi bazanın yaradılmasına start verilib, yaxın vaxtlarda donanmanın əsas raket gəmilərinin əraziyə cəmləşdirilməsinə başlanacaq. Rusiyanın Xəzər donanmasının flaqmanı olan «Gerard» tirli «Tatarıstan» raket gəmisinin də Mahaçqalaya dislokasiyası planlaşdırılır. Mahaçqalada bununla əlaqədar yanacaq və texniki xidmət bazasının yaradılması da nəzərdə tutulur.

Qeyd edək ki, Rusiya Xəzər Hərbi Donanmasının arsenalına 100-dən artıq müxtəlif təyinatlı gəmi, aviasiya dəstəyi bölməsi, həmçinin qanadlı raketlərlə təchiz olunmuş ekranoplanlar daxildir. Qış mövsümündə Xəzərin şimal hissəsinin donması səbəbindən donanmanın əsas gəmiləri müvəqqəti olaraq Həştərxandan cənuba, əsasən də Mahaçqala sahillərinə dislokasiya olunur.