Əfsanəvi müğənni "Eurovision 2025"də çıxış edə bilər: bu ulduz kimdir?

Beynəlxalq mahnı müsabiqəsi "Eurovision-2025" üçün hazırlıqlar sürətlənir. Təşkilatçılar artıq şou üçün gələcək səhnənin ilk kadrlarını nümayiş etdiriblər və aparıcıların adlarını açıqlayıblar.

Lent.az xarici mənbəyə istinadən xəbər verir ki, müsabiqənin prodüserləri bütün izləyicilər üçün sürpriz hazırlayırlar. Hazırda əfsanəvi müğənni Selin Dion ilə danışıqlar aparılır.

37 il əvvəl ulduz "Eurovision"da iştirak edib və qələbə qazanıb. Dion o zaman İsveçrəni təmsil edərək "Ne partez pas sans moi" mahnısı ilə musiqisevərlərin qəlbini fəth etmişdi. Buna görə də, müsabiqənin yaradıcıları hesab edirlər ki, Selin şounu unudulmaz edəcək ən yaxşı insandır.

"İcraçı prodüserlər Reto Peritz və Moritz Stadler onun komandası ilə danışıqlar apardıqlarını təsdiqlədilər, lakin çıxış hələ də sual altındadır, çünki onun sağlamlıq problemləri var. Yalnız bir neçə həftədən sonra Selinin kifayət qədər sağlam olub-olmayacağı aydın olacaq", - mənbələr qeyd edir.

Qeyd edək ki, müğənni Selin Dion uzun illərdir "rigid insan sindromu"ndan əziyyət çəkir - bu, əzələlərin normal fəaliyyətini pozan autoimmun xəstəlikdir. Hazırda müğənni konsert vermir və yalnız keçən il uzun bir müddətdən sonra Parisdəki Olimpiya Oyunlarının açılış mərasimində çıxış edib.