“PEN” kluba Güney Azərbaycan adı ilə ilk üzv qəbul olunub

Yaşadığı ölkədən asılı olmayaraq, mühacirətdə olan soydaşlarımızın uğurları bizləri də sevindirir. Bu günlərdə şair və türkoloq Süleymanoğlu dünyanın tanınmış Beynəlxalq Yazarlar dərnəyinin (PEN CLUP İNTERNATİONAL) Fransa bölümünə yazar, şair kimi üzv qəbul olunub.

Bir sıra dartışmalardan sonra PEN-klubun Fransa bölümü, soydaşımız Süleymanoğlunun istəyi, açıqlamalarına əsaslanaraq, onun üzvlüyünü Güney Azərbaycan yazarı kimi təsdiqləyib.

Xatırladaq ki, Süleymanoğlu bu bölümün ilk güney azərbaycanlı yazar üzvüdür. Bundan başqa o, Parisdə Şərq dilləri və Mədəniyyəti üzrə Universitetin Azərbaycan türkcəsi və ədəbiyyatı bölümündən ilk dəfə olaraq, Süleymanoğlunun əsərləri Fransada türkologiya ilə bağlı dərsliyə salınıb. Güney Azərbaycanla bağlı ədəbiyyat Parisin türkoloji universitetində maraqla qarşılanıb. Süleymanoğlunun və adı hələlik məlum olmayan başqa bir güney azərbaycanlının əsərlərindən hissələr fransızcaya tərcümə edilərək, dərsliyə belə salınıb.

Hüseyn Süleymanoğlu 1961-ci ildə Güney Azərbaycanın Şahsevən elinin Yarcanlı – Bələşli anadan olub. O, Azərbaycan türkcəsi ilə yanaşı fransız dilində də şeirlər və publisistik yazılar yazır. 1983-ci ildən Fransada sürgündə yaşayır.

Sədrəddin Soltan