Putinlə Lukaşenko hokkey oynayıb

Bu gün Rusiya prezidenti Vladimir Putin və Belarus prezidenti Aleksandr Lukaşenko Soçi şəhərindəki “Bolşoy” buz sarayında keçirilən Rusiya hokkey ulduzlarının yoldaşlıq matçında iştirak ediblər.

APA-nın “RİA Novosti”yə istinadən verdiyi məlumata görə, V. Putin və A. Lukaşenko qırmız formalı komandanın tərkibində ağ formalı komandanın Sergey Makarov, Aleksandr Mogilnıy, Aleksandr Yakuşev, Aleksandr Qolikov, İrek Qimayev, Nikolay Makarov kimi ulduzlarına qarşı oynayıblar. Prezidentlərin oynadığı komandanın heyətində isə Vyaçeslav Fetisov, Pavel Bure, Aleksey Qusarov, Andrey Kovalenko, Aleksandr Kojevnikov kimi ulduzlar təmsil olunub. Qırmızılar 12:3 hesabı ilə qalib gəliblər.

Rusiya prezidentinin mətbuat katibi Dmitri Peskov Putin və Lukaşenkonun təmaslarının müntəzəm xarakter daşıdığını söyləyib: “Liderlər bir-birini Yeni il münasibətilə təbrik etmək üçün zəngləşiblər. Soçidə hokkey ulduzlarının qarşılaşmasını keçiriləcəyini və Lukaşenkonun bu oyuna marağını bilən Putin onu Soçiyə dəvət edib. Prezidentlər bu imkandan yararlanıblar və Olimpiya oyunları zamanı hokkey yarışının finalının keçiriləcəyi buz meydançasına çıxıblar”.