İpoteka krediti alanların sayı 3400 nəfərə çatıb

Son üç ildə ipoteka kreditləşməsi üçün 134 milyon manat xərclənib

Ölkədə ipoteka kreditləşməsinin bərpa olunmasından – iyunun 1-dən noyabrın 1-dək 1400 nəfərə yaxın vətəndaşa ipoteka krediti verilib. İndiyədək verilmiş kredit vəsaitlərinin ümumi həcmi isə 59 milyon manat olub.

Azərbaycan İpoteka Fondundan Lent.az-a bildiriblər ki, oktyabr ayında 12 milyon manat məbləğində ipoteka krediti verilib. Bu vəsait hesablına 300-ə yaxın ailə öz yaşayış-mənzil şəraitini yaxşılaşdırıb.

Beləliklə, 2006-cı ilin mart ayından başlayaraq, Mərkəzi Bankı nəzdində Azərbaycan İpoteka Fondunun xətti ilə verilən ipoteka kreditlərinin ümumi həcmi 134 milyon manatı keçib. Nəticədə 3400-ə yaxın ailə ipoteka kreditləri hesabına öz yaşayış-mənzil şəraitinin yaxşılaşdırılmasına və sosial ehtiyaclarının ödənilməsinə nail olub.

Xatırladaq ki, 2010-cu ilin dövlət büdcəsindən ipoteka kreditləşməsinə 14 milyon manat vəsaitin ayrılması proqnozlaşdırılıb.
Elxan SALAHOV