1 ayda 20 ipoteka krediti verilib
02 iyul 2009 10:00 (UTC +04:00)

1 ayda 20 ipoteka krediti verilib

İpoteka kreditlərinə maraq, müraciətlərin sayı və ayrılan vəsait 2006-cı illə müqayisədə çoxdur

Azərbaycan İpoteka Fondu ötən bir ayda ipoteka kreditlərinin verilməsi üzrə hesabatı açıqlayıb. Məlum olub ki, Azərbaycanda ipoteka kreditləşməsinin bərpa olunduğu iyun ayı ərzində cəmi 20 nəfərə kredit vermək mümkün olub.

Fonddan Lent.az-a bildiriblər ki, ötən ay müvəkkil kredit təşkilatları tərəfindən adi ipoteka krediti almaq üçün 544, güzəştli ipoteka krediti almaq üçün isə 44 vətəndaşın rəsmi müraciət ərizəsi qəbul edilib. Daxil olmuş müraciətlər üzrə kredit məbləğlərinin ümumi həcmi isə 26 milyon manata yaxındır.

Fondda deyirlər ki, iyunun 11-dən etibarən artıq ipoteka kreditlərinin verilməsinə başlayıb və ay ərzində verilmiş kreditlərin məbləği təxminən 1 milyon manat təşkil edib. Qurumun hesablamalarına görə, ümumilikdə ölkədə ipoteka kreditlərinə maraq, müraciətlərin sayı və ayrılan vəsait 2006-cı illə müqayisədə xeyli çoxdur. Belə ki, ölkədə ilk dəfə ipoteka kreditləşməsinə start verildiyi həmin dövrdə birinci ay ərzində cəmi 4 ipoteka kreditinin verilmişdi.

Elxan SALAHOV
# 582

Oxşar yazılar