“Xəzər Lənkəran”ın qapıçısı əfv edildi

AFFA-nın Apellyasiya və Ekspert Komitəsinin növbəti iclasında “Xəzər Lənkəran” klubunun müraciətinə baxılıb. Lent.az-ın məlumatına görə, müzakirələrdən sonra İntizam Komitəsinin komandanın qapıçısı Kamal Bayramov barədə qərarı qismən dəyişdirilib.

Məlumata görə, Bayramov 1 oyunluq kənarlaşdırılıb, digər 2 oyunluq cəzadan isə 6 aylıq sınaq müddəti tətbiq edilməklə azad olunub. 6 aylıq sınaq müddəti ərzində qapıçı analoji hərəkətlərə yol verəcəyi təqdirdə ona təyin olunmuş intizam tədbiri hazırkı azad olunmuş cəzaya əlavə olunacaq.

Qeyd edək ki, Kamal Bayramov Topaz Premyer Liqasının XIV turunda “Kəpəz”lə oyundan sonra gəncəli azarkeşləri təhqir etdiyi üçün İntizam Komitəsi tərəfindən 3 oyunluq cəzaya, klubu 2000 manat cəriməyə məruz qalıb. Yeni qərara əsasən, o, cəzasını AZAL-la XV tur matçında başa vurub və qarşıdakı turda - dekabrın 10-da “Bakı” ilə matçda meydana çıxa biləcək.