UEFA Serbiyanı cəzalandıracaq

UEFA Serbiya yığmasına intizam cəzası kəsmək niyyətində olduğunu açıqlayıb. Lent.az-ın məlumatına görə, səbəb İngiltərə ilə oktyabrın 16-da keçirilmiş gənclər arasında Avropa çempionatının seçmə oyunu zamanı serbiyalı azarkeşlərin irqçi şüarlar səsləndirmələridir.

Eyni zamanda ingiltərəli və serbiyalı oyunçulara qarşı özlərini ləyaqətsiz aparmaları ittihamı ilə araşdırma aparılacaq. UEFA İntizam Komissiyasında qalmaqallı oyunla bağlı dinləmələr noyabrın 22-də olacaq.

Qeyd edək ki, daha öncə Böyük Britaniyanın baş naziri Devid Kemeron İngiltərə yığmasındakı qaradərili futbolçuların ünvanına irqçi təhqirlərlə əlaqədar UEFA-nı Serbiyaya qarşı ciddi tədbirlər görməyə çağırıb. Ümumiyyətlə, serbiyalı futbolçular və fanatlar daim özlərini aqressiv aparırlar. Avropa Liqasının qrup mərhələsində “Neftçi” ilə oyun zamanı da bu ölkəni təmsil edən “Partizan”ın oyunçuları flaqmanın serbiyalı qapıçısı Saşa Stamenkoviçə hücum ediblər. Baş vermiş insidentlə əlaqədar “Neftçi” rəhbərliyi UEFA-ya şikayət edib.