Oğuzda iki avtomobil toqquşdu: 5 yaralı

Oğuzda iki avtomobilin toqquşması nəticəsində beş nəfər xəsarət alıb.

Oğuz rayon Polis Şöbəsindən APA-nın Şəki-Zaqatala bürosuna verilən məlumata görə, beş nəfərin yaralanması ilə nəticələnən yol qəzası Oğuz şəhəri ərazisində baş verib.

Oğuz şəhər sakini, 1934-cü il təvəllüdlü Kərimov Ziyəddin Hümbət oğlunun idarə etdiyi “VAZ-2121” markalı 55 BD 696 nişan dövlət nömrəli avtomobillə Oğuz rayonu Calut kənd sakini, 1972-ci il təvəllüdlü Ələsgərov Nemət Məhəmməd oğlunun idarə etdiyi “VAZ-2105” markalı 10 OG 793 nişan dövlət nömrəli avtomobil toqquşub. Qəza nəticəsində “VAZ-2121” markalı avtomobilin sürücüsü Ziyəddin Kərimov, avtomobildə olan sərnişinlər - Ziyəddin Kərimovun həyat yoldaşı, 1942-ci il təvəllüdlü Kərimova Gülzar Aydın qızı, onların gəlini, hazırda Rusiyanın dövlətinin Narinski şəhərində yaşayan 1974-cü il təvəllüdlü Kərimova İnarə Axmedovna, “VAZ-2105” markalı avtomobilin sürücüsü Nemət Ələsgərov və onun sərnişini, rayonun Calut kənd sakini, 1974-cü il təvəllüdlü Mürsəlov Vüqar Məmməd oğlu aldıqları müxtəlif dərəcəli bədən xəsarətləri ilə Oğuz Mərkəzi Rayon Xəstəxanasına (MRX) aparılıblar.

Oğuz MRX-dan APA-ya verilən məlumata görə, qəza nəticəsində xəstəxanaya daxil olan xəstələrdən Ziyəddin Kərimovun vəziyyəti orta ağır hesab olunur, müalicəsi xəstəxanada davam etdirilir. Digər xəstələrin isə xəsarətləri yüngül olduğundan, xəstəxanada onlara ilkin yardım göstərildikdən sonra ambulator müalicə almaq üçün evə buraxılıblar. Faktla bağlı Oğuz RPŞ-də araşdırma aparılır.