Xalq artistinə qarşı 215 minlik DƏLƏDUZLUQ

Rusiyanın xalq artisti Vera Vasilyeva dələduzluğa məruz qalıb.

Lent.az yerli mediaya istinadla bildirir ki, Sankt-Peterburq Musiqili Komediya Teatrının 78 yaşlı aktrisası özünü FTX və hüquq-mühafizə orqanlarının əməkdaşları kimi təqdim edən fırıldaqçıların tələsinə düşüb.

Məlumata görə, mayın 13-də Vasilyeva messencerdə özünü onun keçmiş müdiri adlandıran şəxsdən mesaj alıb. O bildirib ki, mühasibat auditi zamanı sənətçinin əvvəlki vəzifəsində “rəsmi siyahıya alındığı” iddia edilən qanunsuz ödənişlər “aşkar edilib”. Bu, fırıldaqçının sözlərinə görə, xüsusi xidmət orqanlarının diqqətini cəlb edib.

Tezliklə Vasilyevaya özünü Aleksey adlı polis zabiti kimi təqdim edən şəxs zəng edib və onun Ukrayna Silahlı Qüvvələrini maliyyələşdirməkdə şübhəli bilindiyini bildirib. Sonra başqa bir dələduz - "əməliyyat nəzarətçisi" İlya əlaqə saxlayıb və o, aktrisanı "təhlükəsizliyi təmin etmək" üçün "təhlükəsiz hesaba" pul köçürməyə inandırıb.

Təzyiqlərə təslim olan sənətçi nağd pul çıxarıb və Liqovski prospektindəki bank filialına 215 min rubl (təxminən 4546 manat) köçürüb. O, aldadıldığını yalnız əməliyyat başa çatdıqdan sonra başa düşüb.

Hazırda araşdırma aparılır.