ADU-nun yataqxanasında YANĞIN: 9 təcili yardım briqadası hadisə yerində - YENİLƏNİB

TƏBİB Bakıda yataqxana binasında başverən yanğınla bağlı məlumat yayıb.

Qurumdan Lent.az-a bildirilib ki, bu gün saat 09:20 radələrində Respublika Təcili və Təxirəsalınmaz Tibbi Yardım Mərkəzinə Binəqədi rayonu, Ceyhun Hacıbəyli 151 ünvanında, Xarici Dillər Universitetinin yataqxanasında yanğın baş verməsi səbəbi ilə çağırış daxil olub.

Hadisə yerinə dərhal 9 təcili yardım briqadası cəlb olunub.

***

Bakıda yataqxanada baş verən yanğın söndürülüb.

Bu barədə Lent.az-a Fövqəladə Hallar Nazirliyindən məlumat verilib. Bildirilib ki, Binəqədi rayonunda yerləşən binada yanğın baş verib və dərhal əraziyə Fövqəladə Hallar Nazirliyi Dövlət Yanğından Mühafizə Xidməti və Bakı Regional Mərkəzinin qüvvələri cəlb olunub.

Həyata keçirilmiş zəruri və təxirəsalınmaz tədbirlər sayəsində yanğın genişlənməsinə imkan verilmədən qısa müddətdə məhdudlaşdırılaraq söndürülüb.

Yanğın nəticəsində beşmərtəbəli binanın birinci mərtəbəsində, ilkin hesablamaya əsasən, mənzildə 12kv.m sahədə otaq əşyaları və 24p.m elektrik naqilləri yanıb. Digər mənzillər yanğından mühafiə olunub.

FHN qüvvələri tərəfindən təhlükəsizlik tədbirləri çərçivəsində 45 nəfər bina sakini təxliyə edilib.

***

saat 10:09

Azərbaycan Dillər Universiteti yataqxanada baş verən yanğına münasibət bildirib.

Universitetdən Lent.az-a verilən məlumata görə, yanğın baş verən yataqxanada tələbələr yaşamırlar.

Yataqxanada məcburi köçkünlər məskunlaşıb.

Hazırda yanğının söndürülməsi istiqamətində tədbirlər davam etdirilir.

***

saat 10:05

FHN yataqxanada baş verən yanğınla bağlı məlumat yayıb.

Nazirlikdən Lent.az-a verilən məlumata görə, "112" qaynar xəttinə Bakı şəhəri, Binəqədi rayonu, Ceyhun Hacıbəyli küç., 150 ünvanında yerləşən yataqxana binasında yanğın baş verməsi barədə məlumat daxil olub.

Hadisə ilə əlaqədar FHN-in Dövlət Yanğından Mühafizə Xidmətinin qüvvələri dərhal hadisə yerinə cəlb olunub.

Yanğınsöndürənlərin operativ müdaxiləsi nəticəsində yanğın genişlənməsinə imkan verilmədən qısa müddətdə məhdudlaşdırılıb. Hazırda yanğının tam söndürülüməsi istiqamətində tədbirlər davam etdirilir.

***

saat 09:53

Bakıda yataqxana binası yanır.

Lent.az xəbər verir ki, hadisə Azərbayan Dillər Universitetinin Binəqədi rayonunda yerləşən yataqxanasında meydana gəlib.

Əraziyə yanğınsöndürənlər cəlb edilib.

Hazırda yanğının qarşısının alınması istiqamətində tədbirlər davam etdirilir.