Rayondan gəlib Bakıda marketdən seyf oğurladı

Bakıda marketdən oğurluq edən şəxs tutulub.

Daxilii İşlər Nazilriyinin mətbuat xidmətindən Lent.az-a verilən məlumata görə, paytaxtın Nəsimi rayonu, Asif Məhərrəmov küçəsində yerləşən marketlərdən birindən oğurluq edilib. Naməlum şəxs gecə saatlarında mağazanın qapısını sındırıb içəri daxil olaraq oradan 550 qutu müxtəlif növ tütün məmulatları və içərisində 1923 manat olan seyfi götürərək hadisə yerindən uzaqlaşıb. Gecə saatlarında həmin şəxsin şübhəli davranışları və əlindəki oğurlanmış siqaret qutuları ilə polislərin diqqətini cəlb etdiyindən onu Binəqədi rayonu ərazisində polis əməkdaşları saxlayaraq 7-ci Polis Bölməsinə gətiriblər. Bölmədə həmin şəxsin Sabirabad rayon sakini Babək İsmayılov olduğu müəyyən edilib. Onun ərtrafında aparılan əməliyyat tədbirləri ilə əlindəki siqaret qutularını Nəsimi rayonunda yerləşən həmin mağazadan oğurladığını etiraf edib. Babək İsmayılovun həmin obyektdən oğurladığı seyfin də yeri müəyyən edilərək maddi sübut kimi götürülüb.

Araşdırma zamanı Babək İsmayılovun Binəqədi rayonu ərazisində yerləşən binalardan birinin həyətindən ipdən asılmış paltarlar və pərdələr oğurladığı da məlum olub. Saxlanılan şəxs barəsində 7-ci Polis Bölməsində toplanan materiallar araşdırılması üçün Nəsimi rayon Polis İdarəsinə göndərilib. Bu şəxsin əməllərindən zərərçəkən başqa vətəndaşlar varsa ərazi üzrə polis idarə, şöbə və ya bölmələrinə müraciət edə bilərlər.