Sumqayıtdakı silahlı insidentdə 1 nəfər yaralanıb - TƏFƏRRÜAT

Aprelin 8-nə keçən gecə Sumqayıt şəhəri, 18-ci mikrorayonda baş verən silahlı insidentin təfərrüatları məlum olub. Lent.az-ın hüquq-mühafizə orqanlarından əldə etdiyi məlumata görə, Milli Təhlükəsizlik Nazirliyinin əməkdaşları “Aylı gecə” restoranının yaxınlığında yerləşən və narkotik vasitələrin qanunsuz dövriyyəsi ilə məşğul olan şəxslərin olduğu 5 mərtəbəli binanı dövrəyə alıb. Daha sonra həmin binada olan 10-a yaxın mənzildə axtarış aparılıb və şübhəli şəxslər saxlanılıb. Sonuncu axtarış aparılan mənzildən çıxan şəxslər hüquq-mühafizə orqanlarının əməkdaşlarına atəş açıblar. Sonra isə maşına minərək, qaçıblar. Bu zaman həmin maşın bir əməkdaşı vurub. O, yüngül xəsarət alıb.

İnsident zamanı ölən olduğu barədə məlumat hələlik təsdiqini tapmayıb.

Əməliyyat uğurla başa çatdırılıb və şübhəli şəxslərin hamısı saxlanılıb. Atəş açan, həmçinin avtomobillə MTN əməkdaşını vuran şəxslər də sonradan tutulub. Onların istifadə etdiyi silah götürülüb.

Qeyd edək ki, Sumqayıt şəhər prokurorunun böyük köməkçisi Pərviz Əliyev Lent.az-a dünən belə bir əməliyyatın keçirildiyini təsdiqləsə də, ətraflı məlumat verə bilməyəcəyini bildirdi.

Faktla bağlı araşdırma aparılır.

Nizam RZA