1 milyon dollarlıq yaxta dənizdə batdı

İlk səfərinə çıxan yaxtada 8 nəfər olub

Antalyada qiyməti 1 milyon dollar olan yaxta səfərə çıxdığı ilk gün dənizdə batıb.

Lent.az-ın Türkiyə mətbuatına istinadən məlumatına görə, dünən Antalyada “Prenses Doğa” adlı lüks yaxtanın kapitanı Kadir Çelikbaş həyat yoldaşı və 6 qohumu ilə birlikdə dənizə çıxıb.

20 dəqiqə sonra dənizə ilk dəfə çıxan yaxtanın mühərrik hissəsindən su sızmağa başlayıb. Kapitan K.Çelikbaş dəniz polisindən yardım istəyib. Ətrafdakı yaxtalar da köməyə gəliblər.

Sahil təhlükəsizlik qüvvələri kapitanı, onun həyat yoldaşı Mehtap Çelikbaşı, qohumları Süleyman Karakaya, Ali Gök, Tuncay Durak, Ahmet Karakaya, Süleyman Karakaya və Nur Karakayanı xilas ediblər.

Ancaq sahil təhlükəsizlik qüvvələrinin yaxtasının yedəyinə alınan “Prenses Doğa” yaxtasını sahilə, limanına qədər gətirmək mümkün olmayıb və nəticədə milyonluq yaxta sulara gömülüb. Yaxtanın batması anı saniyə-saniyə kameralar tərəfindən qeydə alınıb.